اہل جنت اور اہل جہنم

حضرت حارثہ بن وہب خزاعی رضی اللہ عنہ سے روایت ہے کہ

نبی کریم صلی اللہ علیہ وآلہ وسلم نے فرمایا

کیامیں تمہیں اہل جنت کے بارے میں نہ بتا دوں؟

 وہ دیکھنے میں کمزورو ناتواں ہوتا ہے (لیکن اللہ کے یہاں اس کا مرتبہ یہ ہے کہ)

 اگر کسی بات پر اللہ کی قسم کھا لے تو اللہ اسے ضرور پوری کر دیتا ہے ۔

اورکیا میں تمہیں اہل جہنم کے متعلق نہ بتا دوں؟

  (جہنم میں جائے گا) ہر بدخو،بدزبان، متکبراور سرکش

صحیح بخاری، حدیث#4918،سنن ترمذی حدیث#، سنن ابن ماجہ،حدیث#4116

حضرت انس بن مالک رضی الله عنہ فرماتے ہیں کہ

 رسول اللہ صلی اللہ علیہ وسلم نے فرمایا:

مردے کے ساتھ قبر تک تین چیزیں جاتی ہیں۔ پھر دو چیزیں لوٹ آتی ہیں اور اس کےساتھ ایک چیزباقی رہ جاتی ہے

 اس کے رشتہ دار

اس کا مال

 اور اس کے اعمال ساتھ جاتے ہیں ۔

پھر رشتہ دار، اور مال لوٹ آتے ہیں

اور صرف اس کا عمل اس کے ساتھ باقی رہ جاتا ہے۔

صحيح البخاري، حدیث نمبر: 6514، سنن ترمذی  ،حدیث نمبر 2379

شہادت ایک عظیم رتبہ اور بہت بڑا مقام ہے ۔اسے وہی خوش قسمت پاتے ہیں جن کے مقدر میں ہمیشہ کی کامیابی لکھی ہوتی ہے۔

قرآن پاک اور احا دیث مبار کہ میں بارہا شہادت کے فضائل بیان ہوئے ہیں۔

قران پاک کی سورہ ال عمران میں اللہ تعالی فرماتا ہے

وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ[169] 

فَرِحِينَ بِمَا آتَاهُمُ اللَّهُ مِنْ فَضْلِهِ وَيَسْتَبْشِرُونَ بِالَّذِينَ لَمْ يَلْحَقُوا بِهِمْ مِنْ خَلْفِهِمْ أَلَّا خَوْفٌ عَلَيْهِمْ وَلَا هُمْ يَحْزَنُونَ[170] 

يَسْتَبْشِرُونَ بِنِعْمَةٍ مِنَ اللَّهِ وَفَضْلٍ وَأَنَّ اللَّهَ لَا يُضِيعُ أَجْرَ الْمُؤْمِنِينَ[171]

اور ہر گز نہ سمجھنا ان لوگوں کوجو قتل کیے جاتے ہیں اللہ کی راہ میں(کہ وہ )مردہ ہیں۔ بلکہ وہ تو زندہ ہیں  اپنے رب کے پاس اور ان کو رزق مل رہا ہے (169)

خوش ہیں اس پر جو اللہ نے ان کو دیا اپنے فضل سےاور وہ خوش ہو رہے ہیں ان لوگوں سے جو (ابھی) نہیں پہنچے ان کے پاس انکے پچھلوں میں سے یہ کہ(قیامت کے دن)نہ ان پے کوئی خوف ہو گااور نہ وہ غمناک ہوں گے(170)

وہ خوش ہورہے ہیں اللہ کے انعام اور فضل سےاور(یہ)کہ بے شک اللہ مومنوں کا اجر ضائع نہیں کرتا(171)

سورۃال عمران، آیات 169 تا 171

بِسمِ اللہِ الرَّحمٰنِ الرَّحِيم

اللہ تعالی سورة الاحزاب کی  آیت نمبر56میں فرماتاہے۔

إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا

بیشک اللہ اور ا س کے فرشتے نبیِ کریم صلی اللہ علیہ وآلہ وسلم پر درود بھیجتے رہتے ہیں، اے ایمان والو! تم بھی آپ صلی اللہ علیہ وآلہ وسلم پر درود بھیجا کرو اور خوب سلام بھیجا کرو

سورة الاحزاب, آیت 56

اس آیت میں نبی کریم صلی اللہ علیہ وسلم کی اس عظیم قدرومنزلت اورمرتبہ کا بیان ہے جو (آسمانوں) میں آپ صلی اللہ علیہ وسلم کو حاصل ہے- آپ صلی اللہ علیہ وسلم پردرودو سلام بھیجنا ایک ایسا عظیم عمل ہے جوخوداللہ  اور ا س کے فرشتے بھی کرتے ہیں۔اس لیے اللہ تعالٰی نے اہل ایمان بھی کو حکم دیا کہ وہ بھی آپ صلی اللہ علیہ وسلم پر صلوٰۃ اور سلام بھیجیں۔

حضرت ابو سعید خدری رضی الله عنہ سے روایت ہے کہ

 رسول اللہ صلی اللہ علیہ وسلم نے فرمایاجو شخص یہ کہے

رَضيتُ باللهِ رَباً

وبالإسلامِ ديناً

وبمُحمدٍ نبياً
میں اللہ کے رب ہونے، اسلام کے دین ہونے اور محمد صلی اللہ علیہ وسلم کے نبی ہونے پر راضی ہوا۔

تو جنت اس کے لیے واجب گئی۔

سنن نسائی (حدیث نمبر: 3133)، صحيح مسلم(حدیث نمبر: 4879)

یہ ان تین سوالوں کے جواب ہیں جو قبر میں پوچھے جائیں گے۔یہ کلمات صبح، شام (فجراور مغرب کے وقت) تین تین مرتبہ  پڑھنے چاہییں۔

پانچ چیزیں جو صرف نبی کریم صلی اللہ علیہ وسلم کوعطا کی گئیں

حضرت جابر بن عبداللہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا

مجھے پانچ چیزیں ایسی دی گئی ہیں جو مجھ سے پہلے کسی کو نہیں دی گئی تھیں۔

1۔ایک مہینہ کی مسافت سے رعب کے ذریعہ میری مدد کی گئی ہے۔

2۔اور تمام زمین میرے لیے سجدہ گاہ اور پاکی (تیمم)کے لائق بنائی گئی۔ پس میری امت کا جو انسان نماز کے وقت کو (جہاں بھی) پالے اسے وہیں نماز ادا کر لینی چاہیے۔

3۔ میرے لیے غنیمت کا مال حلال کیا گیا ہے۔ جومجھ سے پہلے کسی کے لیے حلال نہ تھا۔

4۔ مجھے شفاعت عطا کی گئی۔

5۔ تمام انبیاء اپنی اپنی قوم کے لیے مبعوث ہوتے تھے لیکن میں تمام انسانوں کے لیے عام طور پر نبی بنا کر بھیجا گیا ہوں۔

صحيح البخاري ، حدیث نمبر335